जिन्दगीको रफ्तारलाई चित्रण गर्दै सुशान्तको नयाँ गीत

लोकप्रिय गायक तथा सङ्गीतकार सुशान्त घिमिरेले आफ्नो नयाँ गीत ‘जिन्दगीको लरबर’ सार्वजनिक गरेका छन्। “जिन्दगीको लरबरमा नाच्न सिकौँ है, सोम रसले त घुमाउने मात्रै हो” भन्ने निकै घतलाग्दो शब्द रहेको यस गीतले जीवनको दर्शनलाई रमाइलो शैलीमा प्रस्तुत गरेको छ।

सुशान्तकै शब्द, सङ्गीत र स्वर रहेको यस गीतलाई एस्तर रिजन र सुशान्तले संयुक्त रूपमा निर्माण गरेका हुन्। गीतको मिक्सिङ एस्तर र शाश्वत श्रेष्ठले गरेका छन् भने गुरुत्वाकर्षण थप्न विशाल क्षेत्रीको गितार र रुबिन कुमार श्रेष्ठको बाँसुरीको धुन प्रयोग गरिएको छ।

भिडियोतर्फ रोबको निर्देशन र सौरभ लामिछानेको छायाङ्कन रहेको छ। भिडियोमा सुशान्तका साथै शिक्षा शाक्य, नवीन चन्द्र अर्याल लगायतका कलाकारहरूको अभिनय देख्न सकिन्छ। सुनैना श्रेष्ठको कोरियोग्राफीमा तयार पारिएको यस भिडियोले नेवारी संस्कृति र स्थानीय परिवेशलाई सुन्दर ढङ्गले झल्काएको छ। गीतको सुटिङ ललितपुरका विभिन्न स्थानहरूमा गरिएको हो।