नेपालको बहुप्रतिक्षित फिल्म “अञ्जिला” को प्रचारात्मक गीत “डल्ले डल्ले खुर्सानी” सार्वजनिक भएको छ। ओएसआर डिजिटलको आधिकारिक युट्युब च्यानलमार्फत प्रिमियर गरिएको यो गीतले अहिले सम्म १८ लाखभन्दा बढी भ्यूज पाइसकेको छ। गीतले दर्शक तथा श्रोता माझ उच्च लोकप्रियता कमाउँदैछ।
“डल्ले डल्ले खुर्सानी” गीतमा स्वर दिएका छन् राजनराज शिवाकोटी र मेलिना राईले। गीतको शब्द र संगीत राजनराज शिवाकोटीले नै तयार पारेका हुन्। कबिराज गहतराजको कोरियोग्राफी र रामकुमार केसीको छायांकनले गीतलाई थप आकर्षक बनाएको छ। ग्रामीण जीवनशैलीको झल्को दिने यस गीतले चलचित्रको कथा र भावनालाई झल्काउने संकेत गरेको छ।
फिल्म “अञ्जिला” वास्तविक घटनाबाट प्रेरित छ र यो २०२५ मार्च १३ (फागुन २९) मा प्रदर्शनमा आउने तयारीमा छ। मिलन चाम्सको निर्देशनमा तयार पारिएको यस चलचित्रमा दयाहाङ राई, मिरुना मगर, सृजना सुब्बा, माओत्से गुरुङ, बुद्धि तामाङ, र सुनिल थापालगायतका कलाकारको उत्कृष्ट अभिनय हेर्न पाइनेछ। फिल्मलाई मून लभ इन्टरटेनमेन्ट प्रालिले निर्माण गरेको हो।
गीत र फिल्मको प्राविधिक पक्ष पनि विशेष छ। फिल्मको संगीत र पृष्ठभूमि संगीतमा राजनराज शिवाकोटी, हरी लम्साल, र थानेश्वर गौतमले काम गरेका छन्। प्रचारात्मक गीतमा ग्रामीण भेषभूषा, लोक शैलीको झल्को, र नृत्यका उत्कृष्ट पाटोलाई प्राथमिकता दिइएको छ, जसले गीतलाई सबै उमेर समूहका दर्शकमाझ लोकप्रिय बनाएको छ।
फिल्म “अञ्जिला” मार्च १३, २०२५ (फागुन २९) बाट देशभरका हलहरूमा प्रदर्शन हुँदैछ।
Add comment