मित्रता र यादहरूको गीत “बादल सरी”

काठमाडौँ, मङ्सिर ५ – स्वार र जोन राईको आवाजमा रहेको नयाँ गीत “बादल सरी” सार्वजनिक भएको छ। मित्रताको गानको रूपमा प्रस्तुत गरिएको यस गीतले बाल्यकालदेखि जीवनका उतारचढावसम्मका यादहरूलाई उजागर गर्दै सच्चा मित्रताको महत्वलाई दर्शाएको छ।गीतमा स्वप्निल शर्मा र जोन राईको स्वर रहेको छ।

यो गीतले जीवनमा मित्रताको गहिराइ र त्यसले ल्याउने भावनालाई मन छुने शैलीमा प्रस्तुत गरेको छ। भिडियोमा संजन गौतम र जोन राईको अभिनयले वास्तविक मित्रताको कथा झल्काएको छ।

“बादल सरी”लाई रोहित शाक्यले संगीत निर्माण गरेका छन्। ड्रम्समा गौतम तण्डुकार, बास गिटारमा प्रणय लाबुङहाङ, र गिटारमा स्वयम् रोहित शाक्यले साथ दिएका छन्।

गीतको भिडियो फज फ्याक्ट्री प्रोडक्सन्सले निर्माण गरेको हो। निर्देशन, लेखन, र सम्पादन रोहित शाक्यले गरेका छन् भने छायांकन रेवोत श्रेष्ठले गरेका छन्। रंग संयोजन मञ्जित लामाले गरेका छन्, जसले भिडियोमा कलात्मकता थपेको छ।

“बादल सरी”ले बाल्यकालदेखि वयस्क जीवनसम्मका मित्रताको गहिरो भावनालाई समेटेको छ। गीतले जीवनका उतारचढावबीच मित्रताको महत्त्वलाई उजागर गर्दै दर्शकहरूलाई आफ्ना पुराना यादहरूमा फर्काएको छ।

यस गीतले सार्वजनिक भएको केही दिनमै ४७ लाखभन्दा बढी भ्यूज प्राप्त गरेको छ। दर्शकहरूले गीतको भावनात्मक पक्षलाई अत्यन्तै मन पराएका छन्, जसले यो गीतलाई अझै लोकप्रिय बनाएको छ।

गीतको निर्माणमा चितवन राइनोज, समृद्धि स्कूल, र अन्य थुप्रै संस्थाहरूको विशेष सहयोग रहेको छ। यो गीतले नेपाली संगीत क्षेत्रमा नयाँ ऊर्जा थपेको छ।