नेपाली र्याप तथा हिपहप क्षेत्रका चर्चित कलाकार टुकी ले आफ्नो नयाँ आधिकारिक म्युजिक भिडियो ‘इन्डस्ट्रीको बाघ’ सार्वजनिक गरेका छन्। टुकी म्युजिकको आधिकारिक युट्युब च्यानलबाट रिलिज भएको यस गीतले दुई हप्ताको छोटो अवधिमै १२ लाख ५० हजारभन्दा बढी भ्युज बटुलेर युट्युबमा तहल्का मच्चाएको छ।
प्रथम बिट्सको सशक्त संगीत उत्पादनमा तयार भएको यस गीतमा टुकीले आफ्नो सिग्नेचर स्टाइल, कडा शब्द र उत्कृष्ट डेलिभरी प्रस्तुत गरेका छन्। गीतमा प्रयोग भएका “देखाएन मलाई जुत्ताले बाटो, दुःख जति सबै खुट्टाले पाको” जस्ता मर्मस्पर्शी र यथार्थपरक हरफहरूलाई दर्शकहरूले निकै रुचाएका छन्। कतिपय फ्यानहरूले त उनलाई नेपहपको ‘महाकवि’ भन्दै प्रशंसा समेत गरेका छन्।
‘टुकी रेकर्ड्स’ द्वारा व्यवस्थित गरिएको यस भिडियोको भिजुअल र सम्पादन पक्ष पनि निकै उत्कृष्ट रहेको प्रतिक्रिया प्राप्त भएको छ। सामाजिक सञ्जाल र युट्युबको कमेन्ट सेक्सनमा उनलाई यम बुद्धपछिको प्रभावशाली र्यापरको रूपमा चित्रण गरिएको छ।
नेपाली हिपहप सिनमा आफ्नो छुट्टै पहिचान बनाएका टुकीको यो नयाँ प्रस्तुतिले उनलाई साँचो अर्थमा ‘इन्डस्ट्रीको बाघ’ को रूपमा स्थापित गरेको देखिन्छ।
