नेपालको सिनेमा क्षेत्रमा बहुप्रतीक्षित चलचित्र “१२ गाउँ” ले सफलता प्राप्त गरिरहेको छ। चलचित्रको एक्शन, आकर्षक कथा, दमदार अभिनय, र उत्कृष्ट निर्देशनले दर्शकलाई हलसम्म तानिरहेको छ। मुख्य भूमिकामा रहेका अभिनेता विराज भट्ट, न्यान्सी खड्का, सोनु चन्द्रपाल, र दिया मास्केको उत्कृष्ट प्रस्तुतीकरणले चलचित्रलाई अझै रोमाञ्चक बनाएको छ।
साथै, चलचित्रको गीत “यो मनले” पनि सामाजिक सञ्जालमा निकै चर्चित बनेको छ। उक्त गीतमा शहीद मल्ल्य र संजीवनीको स्वर सुन्न सकिन्छ, जसमा अरुण पोखरेलको संगीतले गीतलाई थप मधुर बनाएको छ। गीतको शब्द मुक्ता उदासले लेखेका हुन्। गीतको एरेन्जर अविनाश पासवानले संगीतलाई जीवन्त बनाएका छन् भने रेकर्डिस्ट नरेश बीबीसीले यसलाई स्टुडियोमा उत्कृष्ट रूपमा तयार गरेका छन्। गीतमा गितार संजीव बराईल र भुवन गन्धर्वले ल्याएको लेदर इन्स्ट्रुमेन्ट्सको धुनले विशेषता थपेको छ।
“१२ गाउँ” को स्टन्ट र एक्शन दृश्यहरूलाई साउथ इन्डियन स्टन्ट मास्टर स्टन्ट सिल्वाले निर्देशन गरेका छन्, जसले चलचित्रमा थप ऊर्जा र रोमाञ्चकता दिएको छ। चलचित्रको सम्पादन भूपेन्द्र अधिकारीले गरेका छन् भने रंग संयोजन र भिएफएक्सको कामले चलचित्रलाई दृश्यात्मक रूपमा थप आकर्षक बनाएको छ।
यस फिल्मको निर्माण सरस्वती भट्टले गरेकी हुन् भने निर्देशनको जिम्मेवारी अभिनेता विराज भट्टले लिएका छन्। “१२ गाउँ” ले अहिले देशभरका सिनेमा हलहरूमा राम्रो व्यापार गरिरहेको छ र दर्शकको मनमा विशेष स्थान बनाउन सफल भएको छ।
