“झोले त तै, झोले त मै” ले उब्जायो राजनीतिक झोलाको व्यङ्ग्यात्मक बहस

चर्चित लोक गायक पशुपति शर्माले नयाँ हास्य–व्यङ्ग्यगीत “झोले त तै, झोले त मै” सार्वजनिक गरेका छन्। गीतको सार्वजनिकता सँगै सामाजिक सञ्जाल र युट्युबमा यो भिडियो भाइरल बनेको छ र व्यापक चर्चा झनै बढिरहेको छ।

भिडियोमा देखाइएको “झोले” पात्रले नेपाली जनताको वास्तविक जीवनसँग जोडिएका धेरै यथार्थपूर्ण पक्षहरू प्रस्तुत गरेको छ। यो पात्रले राजनीतिक संलग्नता, भ्रष्टाचार, र जनताको निराशा–पीडालाई हास्य र व्यङ्ग्यको माध्यमबाट देखाएको छ। जसरी झोला बोकेर हिँड्ने राजनीतिक पात्रहरू जनताको भोट र विश्वासमा खेलवाड गर्छन्, त्यही झोलाको प्रतीकत्व लिएर भिडियोले गम्भीर सामाजिक र राजनीतिक विषयवस्तुहरूलाई सजिलै बुझ्ने तरिकाले समेटेको छ।

“झोले त तै, झोले त मै” केवल मनोरञ्जनात्मक हास्य गीत मात्र नभई हाम्रो समाजको ऐना हो। यस गीतले राजनीति र जनजीवनका द्वन्द्वहरूलाई जनप्रिय शैलीमा उभ्याउँदै, आम मानिसका पीडाहरूलाई सुन्ने र सोच्ने मौका दिन्छ। गीतको सरल भाषा, रोचक शब्दावली र सशक्त संगीतले दर्शकलाई हाँस्न बाध्य बनाउने मात्र होइन, गम्भीर विषयमा ध्यानाकर्षण गराउने काम पनि गरेको छ।